Ўш областининг Қорасув район яшовчиси Замира Қосимова иккинчи гуруҳ ногирони. Тўрт йил аввал нафақага чиққан. Бироқ уч йилдан бери давлатдан ёрдам пули ололмайди.

Уч йилдан буён пенсия олмаслигига ижтимоий жамғармани айблаган аёл бундан 4 йил аввал нафақага чиқаётган вақтда ҳам беш минг сом берган.

“Саратон касаллигига чалиниб қолдим. Бир неча марта касалхоналарда даволаниб чиқдим. Ўшанда шифокорлар менга нафақага чиқишим мумкинлиги ҳақида айтишди. Ҳужжатларимни тўғрилаб Қорасув район ижтимоий жамғармасига бордим. Мени нафақага чиқаришга беш минг сом сўрашди. Бўлмаса менга нафақа ажратилмаслигини айтишди. Айтган пулини бериб ойига бир ярим минг сомдан пенсия ола бошладим. Орадан бир йил ўтгандан кейин нафақани давом эттириш учун борсам яна 100 доллар (ўша вақтда 6000 сом бўлган) сўрашди”,-дейди Қосимова.

Бошқармалик ҳодимлари сўраган пулни топиб бера олмаган Қосимова кейин пенсия бўйича ҳеч кимга мурожаат қилмай қўйган. Барибир пулсиз ишим битмайди деган аёлнинг кундалик турмуши куёвининг топгани билан ўта бошлаган. Бу орада куёви ҳам оламдан ўтиб фарзандларини моддий таъминлаш аёлнинг зиммасида қолиб кетган.

“Куёвим борида-ку билинмас экан. Ундан кейин анча қийналиб қолдим. Бир қизимни турмушга берган эдим, икки боласи билан қайтиб келди. Ҳозирги вақтда вояга етмаган  икки болам билан икки неварамни ҳам ўзим қараяпман. Бироқ ўзим оғир касалликка чалинганим сабабли, ҳеч қаерда ишлай олмайман. Уйда ўтириб у-бу нарса тикяпман. Бироқ топганим рўзғордан ортмаяпти”, – дейди Замира Қосимова.

“Биз”дан нажот кутган аёл муаммоси билан мурожаат қилди. Бизнинг мухбирлари иккинчи гуруҳ имконияти чекланган аёлнинг нафақа олмаслиги билан қизиқиб кўрди.

Қорасув район ижтимоий ривожлантириш бўлимининг раҳбари пора сўралиш ҳолатидан бехабар эканини маълум қилди.

“Мен бундан бехабар эдим. Буни устига шу йили ишга келганман. Ўша аёл менга келсин. Бизнинг ҳодимлар томонидан ҳақиқатдан ҳам қонунни бузган ҳоллар учраса, улар жиноий жавобгарликка тортилади. У аёл нафақаси ҳужжатларини топширган кундан бошлаб берила бошлайди”,- дейди Қорасув район ижтимоий жамғарма бўлимининг раҳбари Султанбек Усонов.

Усоновнинг қўшимчасига кўра, шу йили ҳодимлар устидан пора талаб қилиш бўйича бирорта ҳам ариза тушмаган.

Ижтимоий жамғарма бўлими эса аёлга ҳужжат тиббий-ижтимоий экспертиза комиссияси томонидани берилмаётганини маълум қилишди. Агар комиссия ҳақиқатдан ҳам аёлни имконияти чекланган эканини тасдиқлаган ҳужжат берса, тез орада нафақа ажратилишини таъкидлаб ўтди ижтимоий жамғарма вакиллари.

Ҳозирда аёл ҳужжатларини янгилаб, ижтимоий жамғармага топширишга тайёргарлик кўра бошлаган.

Таъкидлаб ўтсак, ҳозирги кунда Қорасув район ижтимоий жамғармасидан  етти минг нафар имконияти чекланганлар нафақа олишади.

Мақола БМТТД ва Финландия ташқи ишлар вазирлиги ҳамкорлигидаги «Қирғизистон Республикасида суд адолатидан фойдаланишни кенгайтириш” ва “Барқарор тинчликни таъминлаш мақсадида ҳуқуқ ҳамда адолат устуворлигини такомиллаштириш” лойиҳалари кўмагида тайёрланди

“Биз”, 21.12.2015