Бубукан Забитакунованинг  иккинчи фарзанди Аяна Осмоналиева туғма касаллик билан дунёга келди. Аяна 40 минг одамдан бирида учрайдиган “Экстрофия мочевого пузыря” бошқача айтганда, қовуқ қисмининг ташқарида жойлашиши билан дунёга келган. Қизим дунёга келганда иккинчи ойгача жинсини аниқлай олишмаган,- дейди Аянанинг онаси Бубукан Забитакунова

“Аяна туғилганда менга доялик қилган аёл 37 йилдан бери туғрухонада ишлаб бундай чақалоқни кўрмаганини айтиб, ҳайрон қолган эди. Вилоят касалхонасига олиб келсак, чақалоқ ўғил фарзанд дейишган. Кейинчалик билсак, у қиз экан”, – деди она.

Бу камлик қилгандек, қизалоқ бир ойлик бўлганда ахлат чиқаришга қийналиб, чинқираб йиғлашга тушади. Нима бўлаётганини тушунмаётган она касалхонага мурожаат қилганда, шифоркорлар қизалоқда ахлат чиқиш йўли кичиклиги сабабли биқинида катта ахлат чиқадиган жой очиш кераклигини айтишган. Аяна уч ойлик бўлганда яъни 2013-йилнинг ноябрь ойида жарроҳлик амалиёти ўтказилиб, биқин тарафидан ахлат чиқадиган жой очилган.

“Бишкекда операцияга кафолат беришмади”

Аяна каби туғма нуқсон билан дунёга келган ёш болалар асосан киндиги тушгунча операция қилиниши керак. Бироқ, Бубукан чилласи чиқмаган қизини олиб Ўш вилоятлар аро касалхонасининг урология бўлимига келганда шифокорлар бундай мутаҳассислар фақат пойтахтда бўлишини айтишган.

“Боламни олиб Бишкекка бордим. Улар операция қиламиз фақат кафолат бермаймиз дейишди. Бундай касалликлар кўпинча чет давлатларда операция қилинишини айтишди. Кейинчалик суриштириб кўрсам Россия давлатининг Москва шаҳрида шундай касалликни даъволайдиган марказ бор экан. Топган-тутганимни йиғиб, Москвадаги шифокорлар билан маслаҳатлашгани бордим. Улар қовуқ қисмини ҳамда ахлат чиқадиган ерига жароҳлик амалиёти ўтказиш учун 10 минг доллардан иккаласига 20 минг АҚШ доллари сўрашди. Ёлғиз ниятим, шу қизим яхши бўлиб кетса бўлди. Ҳозир икки ярим ёш бўлиб қолди. Уч ёшга операция қилиниши керак дейишган. Шунга ҳозир бормаган ерим, ёрдам сўрамаган одамим қолмади”,-деди қаҳрамонимиз.

Аяна дунёга келгандан кейин она қизини парвариш қилиш билангина чекланиб қолган. Сабаби кам учрайдиган касаллик билан туғилган қизалоқни ҳеч ким қарай олмаган. Куёви эса қизи туғилгандан кейин Россия давлатига ишлагани кетган бўйича бедарак. Яшашга уйи йўқ, бирор ерда ишлашнинг ҳам имконини топа олмаган Бубукан ҳозирги кунда бировнинг уйида ижарада туради. Давлат томонидан Аянага бериладиган 3 минг сомга кун кечиришаётганини айтади.

“Куёвим қизим икки ойлик бўлганда Россияга кетдим дегани бўйича бедарак. Бир икки марта телефон қилган. Пул томондан ҳеч қанақа ёрдам бермайди. Қариндош-уруғим шу кунгача қўлидан келганда ёрдам беришди. Шаҳар мэриясига ёрдам беришини сўраб хат ёздим. Бироқ ташҳисни яхши тушунишмадими билмадим ижтимоий ривожлантириш бўлими орқали 15 минг сом ёрдам пули ажратиб беришди”, -дея қўшимча қилди у.

Бундан ташқари у асосан имконияти чекланганларга ёрдам бериш мақсадида ташкил этилган “Элим барсинби” жамоат жамғармасига ёрдам сўраб мурожаат қилган. Ҳозирги кунда фондда ҳайрия ишлари давом этмоқда. Ноябрь ойининг охирида аҳолидан тушган маблағни берамиз дея маълум қилди , жамғарманинг Ўшдаги бўлими.

Иложсиз қолган она шу йилнинг ноябрь ойи сўнгида Давлат раҳбарига ёрдам сўраб, ёзма мурожаат қилди.

Мурожаатга эса давлат раҳбарининг матбуот хизматидан “Бизда Россия давлати билан шартномалар йўқ. Агар ташҳисларни тўлиқ ҳолда юборсангиз Туркия билан тузилган шартнома асосида операция қилинишига ёрдам берилади” деган жавоб келган. Ҳозир Бубукан Забитакунова керакли ҳужжатларини тўпламоқда.

Мақола БМТТД ва Финландия ташқи ишлар вазирлиги ҳамкорлигидаги «Қирғизистон Республикасида суд адолатидан фойдаланишни кенгайтириш” ва “Барқарор тинчликни таъминлаш мақсадида ҳуқуқ ҳамда адолат устуворлигини такомиллаштириш” лойиҳалари кўмагида тайёрланди.

“Биз”, 23.11.2015