“Уулум, кечир, ката менден кетти…” Бөлөсүнө күйөөгө чыгып, балдары майып төрөлгөн эне

 

Ош облусуна караштуу Кара-Суу районундагы Кара-Дөбө айылынын 57 жаштагы тургуну Өлмас Турсунбаева бөлөсүнө турмушка чыккандыктан, эки баласы майып төрөлгөн.

Каармандын 31 жаштагы уулу Мирбек Көчкөнбаев менен 30 жаштагы кызы Бүүсана Көчкөнбаева бала кезинен шал оорусуна чалдыгып, өз алдынча баса алышпайт. Турсунбаева аларды жаш балача жонуна көтөрүп, тосуп, тамактандырып келет. Эне үчүн бул оор түйшүк көнүмүш адатка айланган.

“Уул үйлөп, небере багайын деген тилектерим аткарылбай калды. Себеби жолдошум экөөбүз жакын тууган болгондуктан, каныбыз дал келбей эки балабыз тең майып төрөлүп калды. Дарыгерлер “мындан аркы балдарыңар дагы майып төрөлөт” дегендиктен жолдошум менен ажырашып, ата-энемдин үйүнө баса бергем”, — деди Турсунбаева.

Анын айтымында, жолдошу кийин башкага үйлөнүп, эки баланын атасы болгон. Ал эми Турсунбаева үй-бүлөлүү эркекке экинчи аял болуп тийип, Айкөл аттуу кыздуу болгон. Ал учурда Ош медициналык колледжинин 3-курсунун студенти.

Турсунбаева өз сөзүндө жакын тууган-туушкандар менен баш кошуудан баш тартуу керек экендигин айтып, ыйламсырай уулунан кечирим да сурап алды.

“Уулум, менден деле катачылык кетти окшойт. Ошон үчүн силерди таштабайм да. Ажырашканда да “силерди таштабайм” деп сөз бергем. Эми менден көрбө, баары Алланын буйругу”, — деп эненин жүрөгү эзиле көзүнө жаш алды.Шал оорусуна чалдыккан Мирбек менен Бүүсана баса да, сүйлөй да албайт.

Оор турмушка кабылган айылдашына боору ооругандар учурда каражат топтоп, үч бөлмөлүү үй салуу демилгесин колго алышты… Ал эми эки баласын багуудан колу бошобогон Турсунбаева пенсиясы менен жөлөк пулдун (баары 10 миң сом) эсебинен күн кечирип келет.

Зульфия Тургунова

28.08.2017
Дагы: https://sputnik.kg/video/20170828/1034922269/bolosuno-turmushka-chykkan-ayal.html

 

Be the first to comment

Leave a Reply

Your email address will not be published.


*