Лейлек районунун Голбо айылында ден соолугунан мүмкүнчүлүгү чектелген кыз-келиндер үчүн «Канзат» тигүү цехи ачылды. Бул тууралуу Turmushбасылмасынын аймактык кабарчысына «Бабушка Эдопшн» кайрымдуулук фондунун Баткен облустук филиалынын жетекчиси Алмазбек Рахманов билдирди.Анын айтымында, аталган цех Финляндиянын «Абилис» кайрымдуулук фонду тарабынан ачылган.

«Бул долбоор финландиялык фонддун каржылоосу менен “Борбордук Азия аялдары тынчтык жана стабилдүүлүк үчүн” коомдук фонду тарабынан ишке ашырылууда.

Анын ачылышына Голбо айылынын ден соолугунан мүмкүнчүлүгү чектелген тургуну Жуманова Канзат жана Кулунду айылынын тургуну Алимова Айпери себепчи болгон. Анткени ал экөө биргеликте чакан бизнес жүргүзүү үчүн “Абилис” фондуна долбоор жазып сунуштаган. Натыйжада долбоор комиссияга жагып, алар цех ачып беришти», – дейт А.Рахманов.

Мында тигүүчү кыздардын колунан жасалган буюмдардын жармаңкеси өтүп, катышуучулар улуттук кийимдерди сатып алышты. Ошондой эле, Голбо айылынын аксакалдары үчүн ифтар уюштурулуп, К.Казыев атындагы орто мектебинин жамааты чакан концерт тартуулашты.

Turmush 

17.06.2016 

http://batken.turmush.kg/news:300299